بشعر العامية المصرية
( الخاطف والمخطوف )
اخطف واجري ولا يهمك
ما انتا خلاص بايع دمك
اخطف مفيش حد يقولك
بتعمل ايه ولا هيعاندك
الكل خايف من شرك
لكن انتا لك يوم هتعاني
بسبب الغل اللي ف صدرك
سيْطَر عليك الشَّيْطان
****. ****. ****
تخطف رئيس داخل قصره
من غير ما تنذره وتحاصره
عرَفْتْ تشتري حُرّاسه
بخيانه من أقرب ناسه
اخطف وخلي الناس تسمع
إن انتا إجرامك أفظع
عمرك ما هتكون شبعان
****. ****. ****
عمال تعربد وتغيّر
نظام الدوله وتطيّر
رئيسها وتقول دا مزوَّر
وافعالك السوء بتحير
في كل دوله بتدور
على شيء يفيدك وتطوَّر
مصانع بلدك وتعمَّر
وتبيع سلاحها وتدمَّر
والعالم كله بيتفرج
على عقل شاطط خربان
****. ****. ****
السرقه واضحه ومش خافيه
والنيه عندك مش صافيه
عايز تكوش عالثروه
وتقول لنفسك أنا أولى
من (فنزويلا) وتستولَى
على نفطها من غير شَرْوه
ودهبها زايغ في عينيك
اغرف وعبيه بايديك
طمعك في خيرها يخليك
أضحوكه للي حواليك
بطَّل تهد الأوطان
****. ****. ****
القوَّه عمرها ما بترهب
والرعب أبدا ما بيغلب
بالحب تقدر وتسيطر
وبطمعك انتا اللي هتخسر
سيرتك وكُونَك إنسان
****. ****. ****.
فكّرت نََفسَك كدا (هتلر)
ولَّا حفيد (جنكيز خان)
بتقول لنفسك : أنا أقدر
أشيل فلان أو علَّان
وتنظَّم الكون دا براحتك
وتزيح حدود الأوطان
يا خِي دا كان غيرك أشطر
خليك قنوع مش طمعان
****. ****. ****
شفت النمرود وجبروته
وعَلِمت بحكاية موته
بعوضه واحده خلاته
يسهر ما يعرفش ينام
وضرْب النعال فوق راسه
كان راحه له أكتر واكتر
لكنه مات كده مِتَْهان
****. ****. ****
الدور هييجي على مين
وكل دوله بتفكر
هتعمل ايه لما يحين
معاد الغزو وتدَّبر
إتاوه لك بالملايين
عشان تحوش وتكتر
بكره حقيقتك هتبان
****. ****. ****
( مادورو) أصلاََ كان طاغي
وشعبه عنه ما كان راضي
الشعب وحده اللي يقاضي
رئيسه ويحاكمه دا عادي
تقوم انتا ترصد وتخطط
تحتل بلده وتزبط
مع ا لخاينين وتْسَلَّط
جندك تكتفه وترَبَّط
والشعب أبداََ ما فوَّض
حد انتا كده عمال تغلط
و بتستبيح الأوطان
****. ****. ****
بقلم د / عبد الرحمن فتحي الحناوي.
من مصر.
الخميس ٨ من يناير ( كانون الثاني ) سنة ٢٠٢٦.
ليست هناك تعليقات:
إرسال تعليق