قصيدة بالعامية اللبنانية كتبتها بلسان حال الشهيد مخاطبا امه وقد لحنها وغناها احد الاصدقاء تقول :
ما تنطري ياامي (بالف مهملة )تلفظ يمي مشددة
وما تحملي همي
تعبتي عليي كتير
من يوم كنت زغير
بعمر الورد يامي
يا امي ان قالولك ابنك استشهد
وقلبك غلي من روعة المشهد
ما تندبيني وتذرفي الدموع
وما تندهيني من قلب موجوع
ابن الوطن ابنك
تراب الارض حضنك
وحب الوطن مجبول ب دمي
يا امي
ما تنطريني بليلك ونامي
وما تتعبي ب عد ايامي
يمكن شي فجر بعود مع نسمة
يمكن شي ليل بطل مع نجمة
حد القمر انت القمر يمي
يمي اذكريني عا صباح العيد
يامي البسيلي كل توب جديد
بضحكة طفل فيكي تشوفيني
برفة علم فيكي تلاقيني
بوقفة بطل هونيك عالحدود
بعيون عم تحرس وطن الجدود
بحنوة غصن عم يحلم بضمي
يا أمي
بقلمي ابراهيم حمزة
كتبتها لاقول للسيدة منيرة ان للشعر والادب دور في تنمية حب الاوطان في النفوس فنحن في لبنان احببنا الوطن من خلال مارسيل خليفة الماركسي والذي غن وطن الفقراء والمجاهدين وليس وطن الساسة الفاسدين
ليست هناك تعليقات:
إرسال تعليق