•••••••••• ( الجربوع ) ••••••••••
الكاذب مكروه عند الناس ؛ مذموم عند الله ؛ حيث يقلب الحق باطلا والباطل حقا ؛ ويزيف الواقع مما يمثل خطرا جسيما ووبالا على الأشخاص وعلى المجتمع ؛ فما بال وأن يكون هذا الكاذب خنشورا بلغ من العمر عتيا ومازال يخوض في غيه ولايتوقف وقفة مع نفسه ليستفيق ويقلع عن تلك الآفة المذمومة ؛ فإلى جناب هذا الكاذب وأشباهه أهديهم هذا الزجل •
الجربوع
لما يبقى كبير خنشور
وكل كلامه هتش وكذب
ويعشق كل شهادة زور
تبقى خدوده عايزة الضرب
~~~~~~~~~~~~~~~~~
أى كلمة باطلة يقولها
ويموت خالص فى الإشاعات
شوفوا أمه الله يخيبها
جابت لينا قرود وعاهات
لما يبقى كبير خنشور
وكل كلامه هتش وكذب
~~~~~~~~~~~~~~~~~~
غاوى يقلب الحق باطل
ومش مهم الناس تضر
أصله خسيس وحاله مايل
ومافيش حاجه يقولها تُسر
لما يبقى كبير خنشور
وكل كلامه هتش وكذب
~~~~~~~~~~~~~~~~~~
أوعى تسمع منه كلام
وتردده من غير إدراك
ساعات الكلمة بتبقى سهام
وبتودى لبهتان وهلاك
لما يبقى كبير خنشور
وكل كلامه هتش وكذب
~~~~~~~~~~~~~~~~~
عمر ماكان الحر حلانجى
لإن دى صفة الأندال
حد يقوله الصدق مُنجِّى
ويله توب يااهطل ياشوال
لما يبقى كبير خنشور
وكل كلامه هتش وكذب
~~~~~~~~~~~~~~~~~
وكل " فخره " إن يشيع
كلام من ذهنه ما حصلشى
وزى ما قالوا إن الجربوع
حيكون جربوع ولا ينضفشى
لما يبقى كبير خنشور
وكل كلامه هتش وكذب
~~~~~~~~~~~~~~~~~~~
حقيقى بجد برافو عليك
جوبلز بيبعتلك سقفة
بس نصيحة الله يخليك
نام وغطى " رجليك " وادفى
لما يبقى كبير خنشور
وكل كلامه هتش وكذب
~~~~~~~~~~~~~~~~~~
الشاعر والروائي
والكاتب الصحفى
أيمن عزالدين سكورى
ليست هناك تعليقات:
إرسال تعليق