((غروب وشروق))
دوارة الدنيا بينا
في بحورها ترمينا
واهو احنا بنعوم
لا شراع ولا مينا
حزن ومرار تسقينا
حتى في عز النوم
فرح الحياة مش لينا
وان قولنا آه ونسينا
تشمت الكون فينا
وتبكي في سمانا نجوم
هَب الريح صحينا
لا وصلنا ولا رسينا
ضعنا وانتهينا
والحلم بات مزعوم
صبرنا وما اشتكينا
على روحنا قوي جينا
من كُتر اللي فينا
طافح ومش مفهوم
كاس المرار ألوان
هموم على أحزان
واحنا له عنوان
نصبر ونقول مقسوم
الحظ فات وناسينا
لا روحنا ولا بقينا
توهنا ما التقينا
والقلب بات مكلوم
تصرخ وتبوح عينينا
ولا حد حاسس بينا
غرقنا ولا نجينا
ومصيرنا صار محتوم
مهو احنا بني الإنسان
وأيه بقى في الإمكان
محرومين ومن زمان
واليوم.. يسلم يوم
قاسية الدنيا علينا
غلابة وأيه في أيدينا
ضاقت قوي بينا
وأخر الطريق مهزوم
تايه في ليل سهران
رُبان لكن غرقان
شكلك أكيد سكران
حلمك شراع بيعوم
امشي وروح واسعى
واياك تتوه اوعى
في طريق ملوش راجعة
أخرك هناك معلوم
احذر بلاش توهان
ده الحزن خطوته فدان
مشكلتك تكون إنسان
عايش الحياة مهضوم
لا مِدّفي ولا شبعان
فقران قوي وتعبان
وهمومك معاك بالكوم
مخنوق ولا بتفوق
عيان ولا بتروق
ما بين غروب وشروق
على طول كده ومصدوم
تشقى وتتعب بقى
تاكل وتشرب شقى
واللمة متفرّقة
ومن الحقوق محروم
بقى هي كده يا قلبي
شايف ساكت ومخبي
والغُلب ساكن هنا قربي
وحظك في الحياة مظلوم
قال يعني قال إنسان
بقى تحلم بالأمان
ومعايّا تشوف الهوان
وتعيش الحياة معدوم
صدقني ماله لزوم
أحمد الغرباوي
ليست هناك تعليقات:
إرسال تعليق