((حب وحنان))
أيوة شايفك
اسمعيني بندهك
أيوة عارفك
م انتي قمر الزمان
رغم شيبتي لسه بعرفك
لسه فاكرك زمان
أيام م كنا نجري ونلعب
وبضحكة نملى المكان
كنتي عليّا تجري وقولك مهلك
دي الشمس الصابحة يا حلوة مهرك
طول عمرك وانتي قمر الزمان
فاكرك أيوة فاكرك
فاكرك لسه بضفايرك
زي الورد خدك
والعود ولا غصن بان
فاكر فرحة عيونك وانا وياك
وابتسامتك ولا الملاك
شايفك هنا شايفك هناك..
شايفك والفرحة مالية سماك
من بدري جاي قبلك
فرحان وانا جاي أقابلك
شايف في عينيك الأمان
شايف في عينيك حبك
لسه سامع نبض قلبك
بيغني لحن الهوى والحنان
شايفك هنا شايفك هناك
شايف كل الذكريات
رغم كل اللي فات
أيوة عارفك أيوة فاكرك
حسك ولمسك
وهمسة شفايفك
حتى صدى صوتك كمان
صور مرسومة في حكايات
عايشة في كل ركن
وفي كل زاوية من الجهات
تعزف الشوق نايات
شايف عينيك بتقول الله عليك
وإيدي بتسلم عليك
شايفك بتجري عليّا زي م يكون من ساعات
شايفك وفي عينيّا أحلى البنات
والفرحة مالية عينيك رغم كل اللي فات
واسألي الذكريات
كنت بيتك وأهلك وحضن الدفا والأمان
كنت أصلك وفصلك والصحاب والمكان
كنت وطنك وحدودك والمعنى لوجودك
انتي وانا كنا وكان..
كنت حبك كنت حلمك
عمرك كيانك وكلك
والأسم والعنوان
كنت شمعة أدوب عشانك
وقمر في ليلك.. يطلع يجيلك
كنت أرضك ونيلك
طول عمري أغنيلك
حب وحنان
أحمد الغرباوي
ليست هناك تعليقات:
إرسال تعليق