ف الصوره الضحكه مش باينه
وتجاعيد الوش مرسومه
خطوطها محشوه باﻹسود
والفرحه بعيده مهمومه
والقلب خلف جدار الخوف
نبضه ، صرخه مكتومه
الصوره صحيح مش ليا
دي صورة روحي المكلومه
إل فارقت جسد صاحي
وﻻ حصدت حتى مرحومه
ياليل كاسي من بدري
متشوق لحنين ثومه
شق العتمه خرجني
لغنوه بايته مفهومه
لضي بصدره يلقفني
لنظرة ماباقتشي مصدومه
لحلم فوق فى العالي
بينده نفسي المظلومه
لنهار شمسه بتدفي
لروايه حروفها معلومه
يافرحه ناسيه عنواني
نفسي من الفرحه محرومه
هلي ، إسألي ، طُلي
حدودي بالحزن مرسومه
يا ضوء البدر انا ف عرضك
يا نغمة صوتي المكتومه
عيدوا رسمي من تاني
صحوني يمكن من النومه
قولولي لسه فيا الروح ؟
وﻻ روحي صبحت معدومه !
عبدالحميد المرسى
ليست هناك تعليقات:
إرسال تعليق