ما بدها زعل
كتبت منذ اكثر من اربع سنوات قبل المجاعة الحالية في لبنان
عبد العظيم كحيل 
تحياتي من طرابلس لبنان 
ما بدها زعل 
ألّو يا صاحبي شو رأيك نِتْرَوَءْ
بَعِدْنا على لحم البطن
رد عليه وآلّو 
إيشّ عليهه .....
مِتِل ما بدك يا خَيي
ألّو شو جَاي عَبَالَك
شو رأيك المُعْجَنات
رد وألّو آااه... آاااه...
والله جَبْتها
ألّو شو بْجِبْلَك
رد عليه وألّو لا تِخْبِصها كتير
مابتعرف الرسول شو أوصى
المعدة بيت الداء
ثلث للطعام
وثلث للماء
وثلث للهواء
شو ما بتعرف؟! 
الو بلا فلسفي علي
طيب...طيب... شو بْجِبْلَك
رد وألّو منقوشة بزعتر
منقوشة جبنة
منقوشة جبنة مع الزعتر
وكَام حبة لحم بِعَجين 
كَمَان فطاير السَبَانِغ
لا بد مِن كَام
حبة فطيرة سِلِق
ألّو وبعدين حبيبنا
بس شو بدنا نتحلى
رد جيب صحنين كْنَافة
إاااايه.. إاااايه...والله حزرت
ألّو شو رأيك بِزْنُود ألسِتْ
مع كَام قطعة
حلويات مْشَكَل
طيب... طيب متل مابدك
ألّو والمشروب يا حَبُوبْ 
شوف شو بدك تشرب
رد وألّو ما بدي إلا سلامتك 
بشرب مي
ألّو ليش يا حَبُوبْ...
بَدْنَا نشرب
رد عليه حبيبي
ليش ما بتعرف
المشروبات كلها
فيها سكر... كتير...كتير..
الكباية فيه ثمانية
ملاعق سكر
ألّو شُبَكْ
لا تعمل مِن الحبة قِبَه
لا والله ما بِصير بَدَكْ تشرب
رد عليه ..طيب جبلنا
مشروبات دَايْت
بتعرف هالايام عامل رُجيمْ
والله العظيم بالصدق
ما عَمْ بَاكُل كْتير
محتار منين هَلْكِرِش مِتْدَنْدَل
بِقُولوا لا بد إنك تتحرك 
مايصير تاكل وتقعد
وانا بتحرك كتير
شو بدي اعمل
بنزل بالأسَانْسِير... بِكْرَه الدرج
تصور بمشي للكراج
وبسوق السيارة 
بالمحل ما بتحلى الجلسة
بدون الشيبس
والمكسرات
وجارنا القَهْوَجي
بِعَمِرْلِي الأرغيلة
مع فنجان القهوة 
منجلس و منْبَطِش
ومنِنْسَى هموم الدني
ومنْطَنِش و إنت بتعرف
بهل الايام يلي بِطَنِش بِفَرْفِش
بِحِبْ الغدا خفيف 
سمكة حرة محشية
مكسرات
معمولة بالفرن
مع فروج مَحْشي
مع كام سيخ لحمة
غنم على كَيْفَك
مشوية على الفحم
العَشَا حَواضِر من البيت
كَم بيضة مع شوية لبنة
قرص شنكليشة بلدية
شوية جبنة قبرصية
رغفين خبز على الصَاج
منِشْوي شوية بطاطة
حلوة
منِتْسَلَى بالمكسرات إلاكِسْترا
وعالفَرْشة على طول بنام 
الأولاد بعد العَشَا
على النت والتلفزيون 
إن حَدَا أَلِي يازلمي
حرام عليك
ارحم نفسك مبارح كنت بالمستشفى 
معك الضغط والسكري
برد عليه وبقلو مابموت
الا بِيَومِي
بقلهم بتْرَجَاكم
ما حَدا يسألني
أنا حر بَاكُل شو ما بَاكُل
ما حدا الو عندي شي 
لي عندوا نصيحة
يوفرها لغيري
مظلوم وحياتكم مظلوم
مظلوم و باكل على طول
ما الحق عليي
الجينات عاطله
وراثة من العَيْلة
شو بَعْمِل إذا كان
جدي وعمتي 
و خالتي وستي الله يرحمها
هيك كانوا
كلنا بالظاهر منِطْخَن
مِن شربت مي
وهيك حِجَة
كل واحد طخين 
حتى لو وصل
للكْلاوي يْغَسِل
حتى لو جراحه من السكري
لا تندمل
حتى الضغط دائماً مرتفع
يا اخواني واخواتي
الأعمار صحيح بيد الله
ولكن لا بد من ان نعقلها
من ثم نتوكل
قال: رسول الله
الدين النصيحة
قالو لِمَن يا رسول الله
قال للأئمة المسلمين
وعامتهم 
اللهم إشفي
جميع مرضانا
اللهم آمين آمين
يااااارب العالمين
عبد العظيم كحيل 
