زجلية مصرية.
مرثية شاعر.. بقلمي.. شعبان محمد الطحان.
بيقولوا الشعر كله متاعب
ووجع راس
قلتهم أكتر ده فيه مصايب
تهدَّ الأساس
فيه إللي غاوي وإللي ناوي
وإللي فاكر نفسه أبو نواس
فيه الهري والجري والبلاوي
لا تنعد ولا تنقاس
فيه الشاطر إللي واخد العملية
فتة ولحمة راس
وفيه إللي بيكتب كلامه لنفسه
ميهموش مين قرأ ومين شاف
المهم يكتب ويصرخ ويطلع حسه
بصوت عالي لا قلا ولا بيخاف
وفيه إللي بينافق ويرافق همسه
عشان حبة ورق شفاف
وياعيني ع الغلبان إللي شيطانه مسه
وعمل فيها عنتر ولا بيخاف
أتاري برضوه الشعر فيه محسوبية
زي بقيت الشغلانات
وأنا إللي أفتكرته إبداع وعبقرية
مش هبد واشتغالات
كل حاجة فيكي عوجة ومهلبية
م المحيا حتى الممات
الله يرحمك ياعم جاهين
وأنت ياعم بيرم ونجم والحداد
عملوا الشعر فن وأدب متين
مش رصَّ طوب بشوية مِداد
الكل بقى كاهن وكوهين
وشوية أونطة على حبة وِداد
أقروا الفاتحة على الونجين
على القلم والكلمةوقفلة العداد
حقوق الطبع محفوظة يا حلوين
وقولوا الحق وأنا والنعمة سداد
بقلمي.. شعبان محمد الطحان.
ليست هناك تعليقات:
إرسال تعليق