شعر شعبي: بمناسبة يوم الأرض الخالد
يا يُومِ الوَطَن....
يا وَطَنْ...........يَلّلي بالصَّبْرِ ...........اتْزَنَّر
عَرشِ الظُّلُمْ.......زايِلْ............مَهْمَا اتْجَبَّر
وِالّليلْ.....مَهمَا الّليلِ............طال وِاتْسَمَّر
وِحياتَكْ ....راحِلْ............... بَسّ ِ اتْصَبَّر
يُومِ الأَرِضْ ......... فينا..............كُلْ يُومْ
عُمْرِ العاشِقْ ........يٍستَنّى............وْيِتْفَكَّر
حُبَّكْ فَرِضْ.... مِثلِ الصَّلا...........وِالصُّومْ
يِتْعَتَّقْ في القَلِبْ...مِثلِ العِنِبْ...... يِتْخَمَّر
يا يُومِ الوَطَن ْ.......يا باقي.........يَ مْخَلَّد
مِثِلْ عَصفور......عَلْ غُصُنْ ..........يِتْخَطَّر
قَمِحنا..وِالسَّبَل كُل واحَد فينا...... اسْتَشْهَد
وِالوَطَن فَلّاح.....بِالعَرَق ........وِالدَّمِع غَمَّر
قَرَّبْ جَنَى لِغْلال... قَمِحنَا..........اسْتَحصَد
زَغاريدِ الفَرَح... بَعِد.....................هَالبَيْدَر
*. *. *. *.
وِسْتَنّينَا..كْثيييير يا بيادِر وِالقَلْبِ ....انْكَوىٰ
رَبَّكْ وَالَّله كْبييير رايِح تِفْرَح يَ ....... مْشَحَّر
هَدَّتْنَا المقادير.........يِلعَن بَيِّ.............. النَّوى
خُذنِي دِيرِ اجْرِير........نَسّيني........ تَلِّ الزَّعتَر
لَو تِعرِفْ بِتْحير......قَلبي شو حامِل....... هوى
صوتُه....اهْدِيرِ.....اهْدِير....... مِثلِ النَّبِع يِتفَجَّر
*. *. *. *.
يا مَ اشْرِبنَا المُرِّ .........امْرير نِتجَرَّع ......سَوا
وِينِ الصَّفصافِة (ي) وِالبير.......بِدّي مَيِّ امعَطَّر
وين آخِر هَل مَطَافِ (ي) كافي حبوس وْ مَنافي
كُنتِ امْهَنْدَمْ... غيرَكْ حافِي... ..... صُرتِ امْغَبَّر
حسْرِة قلبي.......ما تِنفَعها...... مَيِّة....... مَطافي
لَو بِالغُصُن.....يَلّلي بقَلبي....كانِ الغُصُن يِتْجَمَّر
سَمِّعني.....صوتِ الشِّبّابِة ( ي) ...رَجّعلي شَبابي
ظالِم.....يَ قانونِ الغابِ (ي) لَ مِيتَ اتْحَسَّر؟
تِسقيني...مُرِّ الشّرابِ (ي) مالَك قَلِب يَ قَصّابي
تِعطي بلادي....لَ غُصَّابِ( ي) خَلُّوا النَّبِع يِتْعَكَّر
.... ..... ... .........خَلُّوا النَّبِع يِتْعَكَّر
حسام صايل البزور
رابا / جنين / فلسطين.
ليست هناك تعليقات:
إرسال تعليق