الشاعر / رضا البوشي
صورة بالالوان
ندهت عليا الفرش
وبترقص الألوان
كان نفسي ارسم لها
صورة بالالوان
وفضلت اقص
وارص ع الألواح
كل النقط النبض فيها شهيد
كل الخطوط حاصناها الف صباح
ومافيش مقص
شغلتة قص
الجراح
رسمت عصفور نملة
والصورة بقت كاملة
عينين زي القمر
موناليزا
كيلو باترا
السنة لولي لكن ضحكتها
زي الشتا باردة
وتحت الحاجب
رسمت علامة إستفهام
جواها كل البشر
ساكتة كما الليام
حزن السنين متحوشين
جوة العينين
في الصورة
على كتفها طفل امير
وابتسامتة زي البدر
في الحواديت
فارس
لوحدة في الفضا
أحلامة
شوال محبة
ومرتبة
ينام عليها الشقيانين
سلاحة حجارة فتاكة
سهام صواريخها جبارة
بتقسم العدو نصين
رصاص العدو خيبان
ومش قادر على الكتاكيت
لا الطيارات تقدر توقف طير
ولا المدافع تقدر تطفي النور
الفجر صبي عفي مزروع
فوق الايدين
بكى سن القلم
صرخ
من صرختة
نزلت دموعي لوحدها
وبكيت
بلت دموعي الورق
والصورة لونها اتحرق
وكأني دموعي مخلوطة بالكبريت
حتى يا قدس
جوة الصورة مشتعلة
كان نفسي ارسم لها
صورة ولو بالزيت
كان نفسي ارسم لها
صورة بالألوان
ليست هناك تعليقات:
إرسال تعليق