بشعر العامية المصرية .
( كرهت كلمة غياب )
بلسان امرأة
كرهت كلمة سفر .. كرهت كلمة غياب
وتعبت لما السهر .. زود نار العذاب
يا حبيبنا حس بينا .. من غيرك احنا ما نساويش
دانتا تاجنا ونور عنينا .. واحنا زيك ما نلاقيش
حس بالليل الطويل .. حس بالقلب العليل
حس بالألم التقيل .. لو ميلنا مره يميل
حس بالسهر اللي خلى .. يأسنا بيجري ورانا
حس بالشوق اللي عدى .. عندنا و كسر ببيانا
حس بالألم اللي طول .. ما خلف وعده معانا
حس بالصبر اللي نول.. غيرنا وعمره ما روانا
ارجع لعشك تاني .. واستمتع بذكرياتك
وازرع بستان أماني .. وارعى زهرة نور حياتك
حسسنا بالأمان من أول طلعة شمس
خلينا بس ننام من غير زعل ولا همس
الله عليكي يا دنيا دا حبيبي قرب يرجع
وانا نفسي اشوف الدنيا تتباهى بينا وتسمع
تسمع كل كلمه .. ترصد كل همسه
تحس نبض الفرحه .. وصدى النغم الجميل
تطفي نار الوحده .. نرتاح بعد مده
نقوم بعد شده .. وعذاب الليل الطويل
أنا صاحيه ولا نايمه !
أنا بحلم ولا هايمه !
صاحيه ولا نايمه .. كل دا ما يهمنيش
المهم الدنيا عارفه.. إنه جاي تاني يعيش
جاي ندمان عالغياب .. وعلى كل لحظة طيش
جاي مشحون بالعتاب .. بس خايفه ما يعرفنيش
جاي بعد سنين عذاب .. جاي ناوي خلاص يعيش
سايب صفحه في الكتاب .. لو اتقفلت ما يهمنيش
مادام نوره في السحاب .. ونجمته ما بتنطفيش
---------------------------
بقلم د / عبد الرحمن فتحي الحناوي .
من مصر .
الاحد ٢٤ من يوليو ( تموز ) سنة ٢٠٢٢
ليست هناك تعليقات:
إرسال تعليق