(( أما براوه ))
كنت قوللي مش هتيجي
واكتم الحزن في روحي
وأقتل العشم اللي خادني
وأطبب من تاني جروحي
كنت قوللي مش هتيجي
بِجِملة عمري اللي ضاع
كنت هخرس غصب عني
كنت هرضى بالوداع
كنت هكتب بوست أقول
إشترينا وهو باع
كنت هزعل؟ ، أيوه هزعل
بس هما يادوب يومين
وان كبر الموضوع شويه
يمكن تنزل دمعتين
والصحاب ييجوا يواسوني
ويهدوني بكلمتين
ويعدي الأمر ببساطه
وابقى زينه وانت زين
شوفت ازاي إن الحكايه
من البدايه كات بسيطه
هو حتة جرح في كرامه
مفيش داعي للزمبليطه
انت متعود جرحي عادي
ليه النوبادي أدخل ف حيطه
آه نسيت إن الرجوله
إنك تجرح وبقساوه
وأني أشوف بنن عيني
خنجر بيغز بغباوه
وف وسط ناس تقول برافوو
واقف تفخم في العداوه
لأ حقيقي مفيش مثالك
وبقولك أما براوه
أما براوه براوه أما براوه
أما براوه براوه على العداوه
عبدالحميد المرسى
ليست هناك تعليقات:
إرسال تعليق