تعالي نعيش
....................
أنا شايف
بواب القبر
مفتوحه في صبح وليل
وبنودع
ف أحبابنا
ف أصحابنا
ف قرايبنا
بصراخ وعويل
ونرجع زي ما كنا
نعيش في الدنيا
من تاني
نقيم أفراح
ونرقص فيها ونغني
نقول مواويل
نغني الصبر
ماجابش الصبر
ل اللي راح
ولا دامت لنا الأفراح
في يوم الموت
وبنلاقي
عيون بتسح
بدموعها
نفكرها نهاية الكون
صراخ بجنون
كأن الدنيا مش
رايحه لكفن مدفون
وقافله كل أبوابها
بميت ..سكه..
وكام مفتاح
براح الدنيا لما بضيق
مابيدخلش
دبانه
وناس شايفه
حقيقة
الموت وعامله
عنه عميانه
ومش شايفا
اللي
راح مرجعش
كأن الفرقه
مابتوجعش
ولا بتسيب
أثر
حرقه
يفوت اليوم
يدوب بيفوت
محدش
حس بالفرقه
ناكل نشرب
ونرجع تاني
نحسبها
دي خسرانه
دي
مربوحه
ولا بنعمل حساب
روحه
نضيع عمرنا في
أعمال
وقلنا وقال
وننسى
إننا اتساقنا
وننسى إن دا
سوقنا
مننساق كل يوم
للقبر
حبيبتي تعالى
ماتجادليش
نعيش اللحظه
ما تضيعشي
بلاش
ما تضيعيشي
العمر
بين ينفع
ماينفعشي
وسيبي الدنيا
ح تمشي
سواءا عشنا
ما عشناهاش
ما تتغابيش
وماتفاصليش
مادام البيعه
خسرانه
سيبيها اللي
عاوزها
و
تعالي نعيش
....................
محمد محمد الشاعر
ليست هناك تعليقات:
إرسال تعليق