زجل
ماقبل الثورة
( إتنطط )
إتنطط وإعمل مابدالك
إنت ومراتك وعيالك
بس إسمعها مني
بقولهالك:
أنا ( بكره ) هبقى بدالك
إتنطط وإعمل شيتا
وأنا هتنطط زيك
كل ( م الجبنة ) الفيتا
وأنا هلبس وأتشيك
خد لك يومين تنطيط
حد هيحاسبك ياصاحبي؟
أحكم كل عبيط
آآمر حتى اللي: بيحبي
مدام الأيام قعدالك
إتنطط وإعمل مابدالك
إتنطط على كيفك ضيعنا
وأنا برضو ح ألف وأدور
إتنطط على كتافنا وصيعنا
في الآخرة هتلقى خابور
شم نفسك بس علينا
مهو إحنا عزبة أبوك
وإن معجبش ولع فينا
بولاعة أحلى ملوك
وخليك ياقرد على حالك
إتنطط وإعمل مابدالك
آآمر ياسيد الأنطاع
هتلاقينا تحت الخدمة
اللي: زيك أمره مطاع
حتى لو مكانلوش لزمة
وإن مش عاجبك خدمتنا؟
إدينا عقود للخارج
خليك إنت في قعدتنا
وإعتبرنا إحنا خوارج
وإتعايق (بحسنك وجمالك)
إتنطط وإعمل مابدالك
إنت ومراتك وعيالك
كلمات:
حربي علي
شاعرالسويس
.jpg)
ليست هناك تعليقات:
إرسال تعليق