حكايات
هو وهي!!
(هي)
يا اهْل الهَوى دِلُونِي إزاي ألاقي هَواه
الدَمعْ جُوَه عُيوني والضِحك مالي شِفاه
نَرجس وكَادي وجُوري لِسه بِثَغري لَماااه
بِين الشَفايِف لُولِي عَاشقة وعِشقي لُقاه!!
جَايز في يُوم يِرجَعْلي جَايز ماانا عَرفَاه
يِركب بُساطُه لأهلي يِرجع وانا وَيَاه
بَحلم وحِلمي يِطُول والصَبر مِني غار
يِرجَع حَبيبي يِقُول عَاشق وعِشقي نَار!!
بحلم وجُوه الحِلم مَرسُوم طريق عُشاق
بَطلة لأجمل فِيلم اسمه كِفاية فُراق
لِيلي ونهاري بَشُوفُه ومِرايتي فيها غرامه
آه من رِقة كُسوفُه آه من شوقي لكلامه!!
(هو)
يا اهلْ الغرام مَغرورة وغُرورها دَاس إحساسي
حِلوة لكن غَيُورة وِالغِيرة لِيها مآسي
عَايشة كما المَسْحُورة كَتمِت على أنفاسي
كانت زمان عصفورة كانت أهلي وناسي!!
دِلوقتي صِبحت صُورة أنتيكة ع الكراسي
كان حُبها أُسطورة وقلبها كان رَاسي
قِصة حُبنا مشهورة تتحكى في الحَواديت
الأصل فيها الشورى مش دُمْي أو توابيت!!
الحُب إيه غير رُوح بيطبطبْ ع الجِراح
مِش كلمتين ونْرُوح ونقول الحُب راح
الحُب نُور وشْمُوع. وليله مِش مَشاع
ساكِن حتى الضُلوع ومايعرفش الوَداع!!
(قاضي الغرام)
أ -ب -حب
يعني إيه كلمة بحبك
يعني قلب يلاقي قلب
يحس بيه يخاف عليه
يعني شوق الدنيا كله
بين عيونها و بين عينيه
يعني لما الكل بااااااع
قلب واحد مشتريه
يعني قلب يضم قلب
يحن ليه يشتاق إليه
هو مين مالحب ماااات
ولا ناسي الذكرياااات
دا الحب عصفور ورق
و القلم راسم بناااات
يعني إيه كلمة بحبك
يعني حرية و تحرر
و مفيش امتلاك
تحس ب لحظة إنك
ب الدنيا أجمل ملاك
ملازم الملايكة وكلمة واحدة
دايمة معاك حبيبي ب ستناك
دا الحب تسبيحة نبي
مفيش معاه أبدا هلااااااك!!!!!!!!
شعر
وليد حسانين
٢٧/١٢/٢٠١٧
القاهرة /مصر
/وليد عوض إبراهيم حسانين/
ليست هناك تعليقات:
إرسال تعليق