مات جوايا واحد
بقلم الكاتب الصحفي وشاعر البسطاء سعيد سعيد أمام
مات جوايا واحد كان بيصدق كل سلام
ويحسب كل ضحكة صافية ويفتح قلبه قبل الكلام
مات جوايا واحد كان يشيل هموم الناس
وينسى نفسه في الزحمة ويقول الخير هو الأساس
مات جوايا واحد كان لو شاف دمعة يسابق الكل ويجري يمكن يداوي بالإحساس
لكن الدنيا علمتني إن مش كل إيد بتسلم يبقى فيها أمان
ومش كل قلب بيضحك يبقى مليان حنان
شفت وشوش تبيع أخوها بكلمة وتشتري الكذب بثمن
وشفت اللي عاش عمره أمين
واتهموه من غير ذنب
بقيت أوزن الناس بالمواقف مش بالكلام
وأقرا القلوب قبل ما أقرا الملامح
لا عاد يغريني مدح
ولا يوجعني ذم
اللي يعرف قدري أشيله فوق راسي
واللي يبيعني أسيبه لضميره والزمن
أنا مش ندمان إني كنت طيب لكن ندمان
إني اديت الثقة للي ما يستحقهاش
ومن النهارده لا هجري ورا حد
ولا أعاتب حد
ولا أستنى رد الجميل من حد
اللي عايزني هيلاقيني
واللي استكتر وجودي
ربنا يغنيه عني
أصل الكرامة لما تروح مرة
بترجع بصعوبة
والقلب لما يتعلم ما يرجعش مرة تانية
ولو سألوني إيه اللي غيرك ياشاعر البسطاء بين الناس
هقول مش الزمن
اللي غيرني ناس
كنت فاكرهم عمري
وطلعوا مجرد درس
اتعلمته بأغلى تمن واحساس
بقلم الكاتب الصحفي وشاعر البسطاء
سعيد سعيد أمام
ليست هناك تعليقات:
إرسال تعليق